Nú er ég búin að venja mig á að blogga á hverjum degi og get bara ekki hætt... og ég er með hiksta.

Ég fór í skólann í dag, í heilan einn tíma. Sá tími var mjög þreyttur, held að ef hann hefði ekki verið um eitthvað sem ég hef einmitt mikið spáð í undanfarið (pop-og jazz hljómar), hefði ég eflaust sofnað.
Ég fór líka á lúðrasveitaræfingu í dag. Það var skárra en síðast, ótrúlegt en satt. Fengum nýtt lag, Colonel Bogey, það er nú alltaf jafn skemmtilegt :)

Þegar ég kom út í dag var skyndilega orðið kalt. Alveg ískalt, bara. Ég fór fyrst út á peysunni, bara svona eins og venjulega. En ég sneri við í tröppunum og náði í vestið mitt, því það var svo kalt. Þegar ég svo fór á æfinguna, setti ég á mig húfu. Er ekki enn búin að taka hana niður. Ohh, hvað ég hata kulda! En ég elska samt að vera í helling af fötum. Finnst fátt notalegra en að vera í þykkri úlpu, snjóbuxum, með vettlinga og húfu. Það er til mynd af mér um 5 ára gamalli, sem er tekin útí garði í Kambahrauninu um mitt sumar, þar sem ég er búin að klæða mig í öll vetrarfötin mín. Mér fannst vera svo langt síðan ég hafði farið í snjógallann, að ég ákvað að fara bara út í honum, man ennþá hvað tilfinningin var hrikalega notaleg ;)

Strætókortið mitt rann út í dag. Svo að ég fór á strætóskrifstó og ætlaði að athuga hvernig gengi að finna út úr þessu. Það hafði ekkert gengið, svo að ég fékk nýtt kort, sem dugar í mánuð. Þannig að strætó hefur nú sparað mér um 6500 kall (ísl) og ég get ennþá ferðast hvert sem er (innan Nord-Jæren) alveg ókeypis. Megi þær þarna á skrifstofunni bara vera sem lengst að finna út úr þessu :)

Ég er ennþá með hiksta

|