Mér líður einhvern veginn eins og það sé miðsumar... Það er erfitt að halda annað, þegar grasið nær manni upp að hnjám (á þeim fáu stöðum sem sláttuóðir Norðmenn hafa ekki komist að) og sólin skín (með smá morgunskúraundantekningum, en ég meina, þetta er nú einu sinni Stavanger...!) og það er svo heitt úti að, að labba út um dyr, er eins og að labba inn, golan er hlý og svona mettur hiti í loftinu :)
Og ég verð nú að segja, að það er alltaf sagt að Íslendingar séu komnir úr öllum fötunum um leið og sólin byrjar að skína á Fróni, en af því sem ég hef séð hér, þá eru Norðmenn engu skárri. Undanfarinn hálfa mánuðinn er búið að vera kalt og svo í gær kom hitinn (með svona líka bombu!) og voilá, allir komnir á nærbuxurnar bara! Ok, kannski ekki alveg nærbuxurnar, en þú veist hvað ég meina...

Já, og hvað er Berglind að gera í þessu sumarblíðuveðri?! Jú, læra fyrir próf!! Búin að hanga niðrí skóla síðustu tvo daga meira og minna, í prófundirbúningi...
Búin að taka tvö próf og fá útúr þeim báðum.
...Og hér kemur montið, viðkvæmum er bent á að hafa fötu við hliðina á sér á meðan lesningu stendur :)
Úr klarinettprófinu fékk ég að mér hefur farið mikið fram í vetur, og ég hef bætt tóninn minn mikið og ég á að halda áfram á þessari braut.
Úr píanóprófinu fékk ég að ég má vera fullkomnunarsinni í æfingaherberginu, en ekki á tónleikum. Prófdómarinn lagði afskaplega mikla áherslu á það ;) Svo sagði hann að ég spilaði Mozart (Funeral March) undurfallega og það væri erfitt að túlka hann, en ég gerði það mjög vel og í Prokofieff marsinum (sem mér fannst ganga laaangverst) fannst honum frábært að hlusta á mig og að ég hefði einstaklega létt og skoppandi staccato :)
Þannig að ég hef greinilega einhverja píanóhæfileika eftir allt saman ;)
Svo er bara að vona að mér gangi jafnvel í hinum prófunum (sjö-níu-þrettán!)

Svo kom nýi meðleigjandinn aðeins við í dag og skildi eftir smá dót í herberginu sínu. Nýi meðleigjandinn er strákur, sem er skuggalega líkur einum jassgaur í skólanum mínum. Hann heitir Thor (held ég, hann talar ekkert sérlega skýrt) og verður bara hér fram í ágúst, sem þýðir að hann og Therese verða alein hér í allt sumar (Therese finnst það ekki jafn fyndið og mér ;) En svona við fyrsta blikk, virtist hann bara ágætur gaur...

Og veistu hvað ég fattaði i dag?! Það eru bara 12 dagar þar til ég kem heim!! Þvílík og önnur eins gervihnattaöld...!

|

Mikið gasalega á ég ekkert að vera að svara í símann þegar hann vekur mig af værum blundi.
Draslið byrjaði að hringja í morgun á meðan ég svaf á mínu græna eyra og ég verð að viðurkenna að ég var ekki alveg að ná því sem konan var að segja. Við áttum eftirfarandi samtal:

Kona í síma: Halló, þetta er hjá UPS. Við erum með pakka til þín frá USA. (þarna heyrði ég semsagt UIS í stað UPS og var ekki alveg að skilja hvernig pakkinn minn (einhver geisladiskur sem ég vann í keppni á einhverri vefsíðu um daginn) hafði lent hjá þeim)
Ég: Ha, nú? til mín? Hjá ykkur?
KS: Já, hvenær verðurðu heima í dag?
Ég: Ég er að fara í tíma á eftir, má ég ekki bara taka hann þá?
KS: Jújú, við erum á blablablagötu...
Ég: Ha? Er þetta ekki í Bjergsted?
KS: Nei, pakkaafhending er á blabl...
Ég: Nú...ég veit ekkert hvar það er, þá megiði bara senda hann heim.
KS: Alltílæ. Hvenær megum við koma með hann?
Ég: uuuu... (löng þögn) jú, á milli 1 og 3 ef það passar?
KS: Jú, það er fínt.

Ég var lengi á eftir að spá í því hvernig diskurinn hafði eiginlega lent á skrifstofu UIS og af hverju skrifstofan væri hvorki í Bjergsted eða Ullandhaug (þar sem aðalskólinn er)... Það var ekki fyrr en löööngu seinna að ég fattaði að líklegast hefði þetta verið UPS en ekki UIS ;)
...Maður á ekki að svara í símann þegar maður er sofandi!

|

Hann Nils hættir aldrei að koma mér á óvart :)
Fyrir óvita, þá er Nils túbustrákur í skólanum mínum. Hann var líka í Toneheim í fyrra og alveg frá því ég hitti hann fyrst hefur mér fundist hann vera ansi merkilegur fýr. Hann lítur út eins og hann hafi búið í áraraðir í sveit í dýpstu og afskekktustu fjörðum Noregs, þar sem fólk þarf ekki að spá neitt í því hvort föt passi eða einhverjar tennur vanti (það vantar í hann aðra framtönnina). En nei, drengurinn er frá Osló og hefur ferðast til örugglega flestra staða, þar sem eitthvað menningarlegt er að sjá eða heyra.
Nú, Nils er nokkuð töff gaur, reykir (sem er jú aðalkúlið) og drekkur eins og svampur. Ekki akkúrat týpan sem maður sér fyrir sér í þjóðbúning. En jújú, hann Nils mætti sko í þjóðbúning í dag!! Og karlþjóðbúningar Noregs eru nú ekki alveg það sem maður myndi kalla töff eða kúl...
Hér er td myndasería með allskonar búningum

En já, 17. maí er semsagt yfirstaðinn...fyrir mig allavega. Byrjaði daginn á því að taka strætó niðrí bæ, því það átti að vera hátíðarhádegismatur í skólanum. Strætóinn stoppaði á einhverjum fáránlegum stað, því miðbærinn var að sjálfsögðu fullur af fólki. Ég hafði ekki hugmynd um hvar ég var einu sinni, svo ég elti bara hitt fólkið og komst á endanum niðrí bæ, þar sem ég labbaði þvert yfir miðbæinn til að finna strætóstopp fyrir áttuna. Það fann ég og beið þar í rúmar 20 mínútur, en þá gafst ég upp, enda orðin allt allt of sein í matinn og labbaði áleiðis í skólann, stoppaði á bensínstöð til að fá mér eitthvað að borða (Sem betur fer, því hátíðarhádegismaturinn var að sjálfsögðu norskur og ég sver það, fyrr borða ég hrútspunga en að láta þetta ógeð sem þarna var á diskum inn fyrir mínar varir)...
Í garðinum í kringum skólann var svaka fjölþjóðleg hátíð og þar sem ég nennti ekki að vera inni og fylgjast með fólki borða síld, fór ég að fylgjast með. Gerði líka góðverk dagsins þar, hjálpaði einni lítilli stelpu að finna mömmu og pabba, ég er svoooo góð (lesist á innsoginu!)
Svo um þrjúleytið var kominn tími á marseringu og ég viðurkenni fúslega að íslenskar skrúðgöngur komast ekki með tærnar þar sem þær norsku hafa hælana!
Hér eru allir sem stunda íþróttir eða eru í einhverjum félagsskap með í skrúðgöngunni, böns af lúðrasveitum, svo á milli þeirra voru annars konar félög, fyrir framan okkur voru td fótboltastrákar sem voru allir með fótbolta og fyrir aftan okkur íshokkíkrakkar á línuskautum og svo karatekrakkar þar fyrir aftan :)
Háskólalúðrasveitin var líklegast sú frjálslegasta í allri skrúðgöngunni, við vorum ekki í neinum búningum, því þessi lúðrasveit er jú ekkert til í alvörunni, bara þykjustunni ;) Við vorum með fána háskólans fremst og nokkrar dansstelpur næst, (sem mér fannst geðveikt töff!) svo kom lúðrasveitin og þá fólk sem ekki kann að spila á blásturshljóðfæri eða trommur. "Vinstri hægri" fór svona ofan garðs og neðan og raðirnar voru nú ekkert hrikalega beinar og frekar frjálslega farið með nóturnar á lýrunum, en þetta var sko by far skemmtilegasta skrúðganga sem ég hef tekið þátt í :) Við löbbuðum frá miðbænum, eitthvert lengst, lengst út í rassgat, alveg út á eyju og allt og svo plutselig vorum við aftur í miðbænum. Ég hef hinsvegar ekki hugmynd um hvernig við komumst þangað... Á einum stað á leiðinni var flaggað íslenskum fána, sem mér fannst nokkuð töff :) Flestum skólafélögum mínum fannst öruggara að benda mér á fánann, svona ef ske kynni að ég hefði ekki tekið eftir honum og fékk ég því þónokkur bönk í öxlina og "hey, sjáðu, íslenski fáninn!" (bara á norsku, því það kann enginn íslensku)...
En já, eftir þessa skrúðgöngu voru lappirnar á mér alveg búnar og var því afar ljúft að fá að sitja í hjá Tore heim... og ekki séns í helvíti að ég nenni niðrí skóla aftur í grillveislu...verður hvorteðer örugglega bara grilluð síld...!

|

Á morgun er 17. maí, þjóðhátíðardagur Norðmanna. Síðan eftir páskafrí hefur skólahljómsveitin sem ég er að kenna hjá, verið að æfa marsana sína. Klukkan 2 er ég að fara á æfingu hjá lúðrasveit skólans míns, til að æfa marsana okkar. Það má geta þess að þetta er fyrsta æfingin.
Það er víst alveg hellingur að gerast hér á morgun, enda erum við að tala um bæ af Reykjavíkurstærðargráðu...
Hér virðast "togene" (beint þýtt á íslensku: lestirnar) vera aðalmálið. Þegar ég hef verið að spurja hvernig 17 maí sé, þá hafa allir minnst á lestirnar fyrst af öllu. Barnetoget, Russetoget og Folketoget eru lestirnar sem verða hér í Stavanger. Ég var soldið búin að velta þessu fyrir mér, af hverju væri verið að notast við einhverjar lestir, sá að sjálfsögðu fyrir mér svona bíl sem væri eftilíking af lest (svona eins og túristalestir í mörgum borgum eða tívolíum), sem keyrðu um bæinn og stoppuðu alla umferð... Svo komst ég að því áðan, þegar ég var að tala við Elísabetu, að tog er skrúðganga ;)

|

Vúbbs ;)

Frétt www.mbl.is

|

Sko, þolinmæðin þrautir vinnur allar!
Síðustu vikur hefur tölvan verið eitthvað gasalega paranoid og haldið þvi fram að hinar og þessar síður séu ekki seif... Hef þurft að kíkja á póstinn minn í skólanum og ekki komist inn á msn í lengri tíma... en svo allt í einu í dag, er bara allt í lagi! ...skrítið

Ég kíki stundum á barnaland.is, á umræðurnar þar og það er oft hin skemmtilegasta lesning. Í dag þurfti ég hins vegar mikið að hugsa eftir að hafa lesið könnun "kemst rauðhærði karlinn áfram á morgun?" Hvaða rauðhærði karl?! Hvert er hann að fara?!
Svo fattaði ég það...og held að ég verði neydd til að segja mig úr þjóðskránni...!
Það var líka þarna inni sem ég fann eitt mest spennandi blogg, bara ever! Get varla beðið eftir nýrri færslu!

|

Jæja, þá hef ég látið undan...
Fékk mér myspace reikning um daginn... Var orðin svo pirruð á að geta ekki skoðað myndir og annað inn á myspace síðunum, þannig að ég stofnaði reikning og setti inn það sem nauðsynlegt var. Markmið mitt er að eiga ömurlegustu myspace síðuna ;) það er alls ekki neitt inná henni...er samt komin með fullt af vinum...rugl!

Stundum, þegar ég er í strætó, vildi ég óska að lyktir væru á litinn...Þá gæti maður td séð hvaða fólk lyktaði af áfengi eða plain drullu eða hreinlætisskorti og varast að sitja nálægt þeim... En annars var ég í strætó í dag, þar sem ekki dugaði að sitja ekki nálægt manneskjunni... Á fyrstu stoppistöðinni eftir miðbæjarstoppið kom inn kona, með svo hrikalega kleprað hár að ég hef ekki séð annað eins, maður sá sko langar leiðir að sturtan heima hjá henni er ekki mikið notuð. Hún settist næstum fremst (ég sat eiginlega aftast, nota bene!) og það var virkilega ekki líft inní vagninum! Þar sem ég var bara að fara að æfa mig niðrí skóla fór ég út á næstu stöð og labbaði það sem eftir var...á sömu stöð fór rúmlega helmingur farþeganna út og stóðu bara og biðu eftir næsta strætó ;) En sjaldan hef ég verið jafn fegin að anda að mér hreinu lofti!!

|

Lögreglan í Bergen umkringdi í dag banka í bænum, eftir að einhver hafði séð vopnaðan mann þar inni.
Löggan hafði manninn í sikti, þegar upp komst að það væri verið að taka upp kvikmynd og bankaræninginn væri bara leikari!!!

|